Леонид Мантыковай дурасхаалда илалтанууд

Оһын аймагай түймэр сарагшад ээлжээтэ Спартакиадада суглараа. Сентябриин 5-да «Баатар» стадиондо дотоодын албанай полковник Леонид Данилович Мантыковай дурасхаалда зорюулагдаһан Эрхүү можын Гүрэнэй түймэр саралгын албанай хүдэлмэрилэгшэдэй дунда үндэһэн тамирай зүйлнүүдээр Спартакиада үнгэрбэ.

Тус мүрысөөндэ Усть-Ордын Буряадай тойрогто оршодог бүхы зургаан аймагай, Эрхүү, Ангарск хотонуудай, мүн Эрхүү можодо Россиин СПСЧ ФПС ГУ МЧС-эй түймэр саралгын-абаралгын частьнуудһаа 117 тамиршад хабаадаа.

Сугларагшадые Оhын аймагай мэр Борис Хошхоев, Эрхүү можын ГУ МЧС-эй хүтэлбэрилэгшын нэгэдэхи орлогшо Андрей Рябоволов, тойрогой хүтэлбэрилэгшын туhалагша Чингис Жербаков болон бусад амаршалаа.

Абарагшад һур харбаан, бүхэ барилдаан, шатар, таталга, мас-рестлинг (модо татаха), дайшалхы табилга болон hэер шаалган (нюрганай яһа хухалха) гэһэн тамирай долоон янзаар бэлиг шадабарияа харуулаа.

Байлдаанда Боохоной аймагай 44-дэхи ПСЧ-н абарагшад чемпионууд болоо. Мас-рестлингээр түрүүшын һуури Ангарскын команда (3-дахи ПСО) эзэлээ. Канат таталгада Эрхүү можодо Россиин СПСЧ ФПС ГУ МЧС-эй түлөөлэгшэд эгээл шанга байгаа.

Буряад барилдаагаар Эхирэд-Булагадай аймагай түлөөлэгшэд эрхим болобо – 84 килограммhаа дээшэ шэгнүүртэ Бахрушкеев Алексей абарга болоо, 84 килограмм хүрэтэр шэгнүүридэ «мүнгэндэ» Багдуев Анатолий хүртэбэ. Һур харбалгаар Лузгин Алексей (Эхирэд) чемпион болоо. «Һэер шаалганда» Маглаев Сергей (Эхирэд) илагша болобо. Шатарта чемпионой нэрэ зэргэ Оһын аймагай Иванов Павел абаа.

Буряад барилдаагаар Алексей Бахрушкеев абсолютно чемпион болоо.

Спартакиадада илагша команда Эхирэд-Булагадай аймагай түймэр саралгын-абаралгын 43-дахи часть болобо. Оһын аймагай түймэр сарагшад (45-дахи ПСЧ) мүнгэн медальда хүртөө. Баяндай аймагай түймэр саралгын 46-дахи бүлэгэй команда хүрэл медальда хүртөө.

Хубиин тоосоондо илагшад болон шанда хүртэгшэдтэ мүрысөө эмхидхэгшэдэй зүгһөө үнэмшэлгэнүүд, медальнууд болон үнэтэ шангууд барюулагдаа. Илагша команданууд болон мүрысөөнэй янзануудта дипломууд болон кубогууд барюулагдаа,   тиихэдэ шангай   һуури эзэлһэн командануудта таараха шатын дипломууд барюулагдаа.

Эрхим тамиршад тусхай – амиды хуса түхэлтэй – шангуудта хүртөө, Л.Д. Мантыковай түрэлхидһөө, Оһын аймагай мэр Борис Хошхоев болон бусад спонсорнуудһаа мүнгэн шангууд барюулагдаа.

И. Орловагай фото-зурагууд

(«Знамя труда»)

Дополнительные фотографии:  Загрузить / Загрузить