Любовь Алсаева – «Хонишоной найрай» абсолютно илагша

Сентябриин 6-да Буряад орондо анха түрүүшынхиеэ «Хонишоной найр» (ород хэлэн дээрэ оршуулбал, «Праздник чабана») гэһэн наадан үнгэргэгдөө.

Энэ хэмжээ ябуулгын газарынь Доодо Ивалгаһаа 14 км газарта оршодог Бык уула байгаа.

Тус хэмжээ ябуулга этно-гастро-хүгжэмтэ фестивалиин статустай байжа, хоёр мянга гаран хабаадагшадые суглуулаа. Айлшадые болон харагшадые буряад соёлдо, үндэһэн эдеэндэ шэнгээхэ, ташуур нэхэхэ, замбаа шанаха мастер-классуудаар хүндэлһэн байна.

Тиихэдэ һур харбалгаар, һээр хухалха болон шагай наадаар мүрысөөнүүд, мүн уран зураашадай – буряад тайзанай ододой концерт, үнэтэ шангуудтай мүрысөөнүүд эмхидхэгдээ. Шагай нааданай мүрысөөндэ Усть-Орда тосхоной ажаһуугша Любовь Алсаева 18-һаа дээшэ наһатай эхэнэрнүүдэй дунда гансашье илагша болоо бэшэ, мүн абсолютно чемпион болоо.

Тэрэ тосхоной 2-дохи дунда hургуулиин физкультурын багша, областной хүүгэдэй уран hайханай түбэй нэмэлтэ hуралсалай багша, мүн лэ «Эрхим үндэhэн хубсаhан» гэhэн урилдаанда 3-дахи шатын дипломдо хүртэhэн байна.

Любовь Михайловна мүн лэ шагай наадаар Ердын наадануудай, Арадай наадануудай, областной Сур-Харбаанай илагша болоно.