Россиин эдир үльгэршэн Усть-Ордада

Россиин эгээл залуу үльгэршэн, Санкт-Петербургын найман наһатай Мирослава Любина Усть-Ордын Үндэһэтэнэй уран гартанай түб айлшалба. Эдиршье һаа, Мирославагай нэрэ Россиин Хүндэлэлэй номдо оруулагдаһан байна: басаган гурбатайдаа түрүүшынгээ ном бэшэжэ, гүрэнэй эгээл залуу уран зохёолшо болоһон байна.

2020 ондо энэ басаган гэртээ тусгаарлагдаһан байхадаа, пандемиин үедэ мэлхэй ба пеликан, баабгай ба элһэн, сэсэг ба туулай тухай хөөрөөнүүдые зохёожо эхилһэн.

Зохёохы Мирошиин гэр бүлэдэ – тэрэнэй эхэ эсэгэнь Эрмитаж музейн эрдэмэй шэнжэлэгшэд – хизаарлагдамал долоон хоногуудта үльгэр бэшэлгэ үнгэргэгдэдэг байгаа.

Мирослва нэн түрүүн гол дүрэнүүдые һанажа, удаань тэдэнтэй юун болооб гэжэ ойлгоо. Түрэлхидынь басаганайнгаа сэхэ хэлэһые диктофон дээрэ буулгаад, саарһан дээрэ дамжуулһан байна. Эдир бэлигтэн эхэ эсэгэдээл адли зураха дуратай. Тэрэнэй зурагууд рассказуудта нэмэлтэ болоһон юм. Иигэжэ «Мирошиин үльгэрнүүд» гэһэн ном мүндэлөө, хэблэлдэ гараа.

Мүнөөдэр тэрэнэй ажал домогто «Licedei» гэһэн клоун шоугой артистнар болон «Cirque du Soleil»-эй клоунар дэмжэнэ. Тэрэнэй үльгэрнүүд дээрэ үндэ- һэлһэн тоглолтонууд элдэб театрнуудта табигдадаг, Эзэнтэ гүрэнэй шаазанай үйлэдбэри тэрэнэй нэрэтэй өөрын табаг гаргаһан байна.

Һаяхана Сочиин дендрариин парк соо Мирославагай «Лев ба одото хада руу бусаха харгы» гэһэн гурбадахи номой презентаци болобо.

Эдир уншагшадые Кавказай ой тайгануудай амитадай ажабайдалаар һонирхуулха гэжэ оролдожо, автор энэ зохёол хүн зондо хүртээмжэтэйгээр зохёогоо. Номой герой, ирвэс абаргын түбэй эхи табигша болоһон эрдэмтэн Умар Семёнов мүн лэ сюжет соо бии болоо. «Минии даабари хадаа Кавказай ой модоной ажаһуугшадта дүтэ болохо – ирвэсһээ гадна, онтохон соо фазан, жэгүүртэн харуулагдана. Тиихэдэ арга боломжоороо эгээл энгын, хүнгэн хэлэн дээрэ бэшэхэ», – гэжэ залуу уран зохёолшо хөөрэнэ.

Тус ном залуу үетэниие ирвэсэй ажабайдалай онсо шэнжэнүүдтэй, амитадай хоморой зүйлнүүдые хадагалха асуудалнуудтай танилсуулха зорилготой. Автор Мирослава Любина өөрынгөө ном байгаалидаа дурлал түрүүлхэ, оршон тойронхи байгаалияа гамнаха шухала гэжэ ойлгуулха бэзэ гэжэ найдана.

Басаганай эжы, Екатерина Хмельницкая уран һайханай түүхын эрдэмэй доктор, XIX–XXI зуун жэлнүүдэй ород шаазанай суглуулбариин хадагалагша юм. Эсэгэнь, Дмитрий Любин, уран зурагай түүхын эрдэмэй дид-доктор, «Арсенал» таһагые даагша, Ородой Уран зурагай академиин гэшүүн-корреспондент.

Усть-Орда тосхондо Любинай гэр бүлэ Түбэй үзэсхэлэнгүүдтэ дурадхагдаһан буряад заншалта соёлтой ехэ һонирхолтойгоор танилсажа, нютагай дархашуулай бүтээһэн гоёолтонуудые худалдан абаа.