Эрхимэй эрхимэшүүл элирүүлэгдээ

Буряад ороной   ниислэл Улаан-Үдэ хотодо «Түрэлхи хэлэнэй ба түрэлхи литературын эрхим багша» гэһэн Бүхэроссиин мэргэжэлтэ мүрысөөнэй түгэсхэлэй шата дүүрэбэ.

Тэндэ Россиин элдэб нютагуудһаа 75 багшанар, 31 хүмүүжүүлэгшэд суглараа.

Энэ урилдаанда манай тойрогой эрхим багшанар Оhын аймагай Хаһаагай дунда hургуулиин буряад хэлэнэй багша Эльвира Батудаева болон Оhо тосхоной 2-дохи хүүгэдэй сэсэрлигэй багша Наталья Спасова гэгшэд хабаадаба.

Манай регионой делегациие тойрогой захиргаанай үндэһэн хэлэнүүдэй таһагай дарга Вероника Харбанова, Эрхүү можын эрдэм һуралсалай хүгжэлтын институдай этнорегиональна һуралсалай түбэй даагша Наталья Замбулаева, тойрогой буряад хэлэнэй багшанарай бүлгэмэй түрүүлэгшэ Инна Атутова, Бэлшэрэй дунда һургуулиин дарга Валентина Хартанова гэгшэд хүтэлбэрилһэн.

Россиин эрхим багшанар түрэлхи хэлэнүүдые ба уран зохёолнуудые зааха өөрын үрэ дүнтэй методическа практикануудые харуулжа, болбосоролой һалбарида мүнөө үеын социально-культурна шэглэлнүүд болон стратегическа заабаринууд дээрэ үндэһэлэн, педагогикын дүй дүршэл шэнжэлхэ, системнэ болгохо шадабаритай байһанаа харуулаа.

Бүхэроссиин мүрысөөнэй илагшад хоёр номинацида элирүүлэгдэбэ. «Түрэлхи хэлэнэй ба түрэлхи уран зохёолой эрхим багша» гэһэн номинацида Юлия Ситникова (Липецкын можо) түрүүлжэ гараа. «Һургуулиин наһа гүйсөөгүй үхибүүдэй түрэлхи хэлэ хүгжөөхэ эрхим дүршэлнүүд» гэһэн номинацида Виктория Настаева (Хальмаг Улас) нэгэдэхи һуури эзэлээ.

Түрэл хэлэнэй багшанарай ехэ урилдаанда амжалтатай хабаадаһан манай тойрогой эрхим буряад хэлэнэй багша Эльвира Батудаева һайшаал магтаалай үгэдэ хүртэнэ.

Оһын сэсэрлигэй нэмэлтэ һуралсалай багша Наталья Спасова «Түрэл хэлэнэй ба түрэлхи литературын эрхим багша» гэһэн мүрысөөнэй 15 лауреадуудай тоодо ороһон байна.

«Үндэһэн хэлэнүүдые сахиха хэрэгтэ гүрэнэймнай иимэ ехэ анхарал хандуулагдажа байһандань бидэ ехэ баяртайбди, үндэһэн хэлэнүүдые бэхижүүлхэ, сахиха хэрэгтэй, юундэб гэхэдэ, энэмнай ургажа ябаа залуу үетэндэ, бүхыдөө соёлдо үнэхөөрөөшье шухала», – гээд мүрысөөнэй хабаадагшад тоолоно.