Олон үхибүүдэй эхэдэ – хүгжэлтын тэдхэмжэдэ хүртэнэ

Эрхүү можын табан эхэнэр олзын хэрэг эрхилэгшэд «Эжы-олзын хэрэг эрхилэгшэ» гэһэн программын региональна шатада түрүүшүүл гэжэ тодороо.

Алайрай, Эрхүүгэй, Усолиин аймагуудай болон Эрхүү хотын табан эхэнэрнүүд 150 мянган түхэригэй грантда хүртэхэ юм. Бүхыдөө 200 мэдүүлгэ ороһон байна.

Региональна шатада Алайрай аймагай Зоны нютагай Алена Тютрина илагша болобо. Тэрэ табан үхибүүдэй эхэ, сэрэгэй тусхай операцида хабаадагшын һамган юм. Тэрэ долоон жэлэй туршада сыр шанаха дуратай. Мүнөө 150 мянган түхэригэй грантын ашаар Алена сыр хүгшэрүүлдэг камера худалдажа абаад, дуратай хэрэгээ олзын хэрэг эрхилэлгэ болгохо юм.

«Мүн лэ удангүй федеральна шатада уридшалһан шэлэн абалга эхилхэ. Алена Тютрина тэрэниие дабажа, федеральна шатада нютагайнгаа нэрэ хүндые хамгаалха бэзэ гэжэ найдая», – гэжэ «Минии бизнес» түбэй захирал Диляра Окладникова хэлэбэ.