Манай барилдаашадай шагналнууд

16 тамиршад дэлхэйн чемпион Борис Будаевай шангуудта хүртэхын түлөө эдиршүүлэй сүлөөтэ барилдаагаар XXXIV Уласхоорондын мүрысөөндэ Эрхүү можые түлөөлһэн байна.

Монгол, Кыргызстан, Узбекистан, Тыва улас, Красноярскын хизаар, Кемеровын можо, Үбэр Байгалай хизаар, Саха-Яхад улас, Буряад уласай 250 тамиршад медальнуудай түлөө тэмсэбэ.

Ойхон аймагай гарбалтай Валерий Алагуев хүрэл медальда хүртөө. Тэрэ 65 килограммай шэгнүүртэ гурбадахи һуури эзэлхын түлөө тэмсэжэ, Буряадай Алас Дурнын федеральна тойрогой чемпионадай мүнгэн призер Золто Цыбеновтэй уулзажа, медальда хүртөө. Тус уулзалга 10-0 гэһэн тоотойгоор Алагуевай талада түгэсэбэ.

Валерий Алагуев «Тамир» һургуулиин һоригшо Михаил Мухтыровтай һорилго хэжэ, Эхирэд-Булагадай аймагые түлөөлнэ.

Байкальск нютагһаа гарбалтай Руслан Юршин тон адли оноотойгоор алтан медальда хүртөө. Тэрэ 92 килограммай шэгнүүртэ Монголой тамиршан Эрдэнэмүнхын Баярбаатартай барилдаа.

Оһын аймагай Виктор Николаев болон Буряад уласай Андрей Дагаев хоёрой хоорондо хүрэл медаль абахын түлөө нягта тулалдаан болоо. Тус уулзалга 13:3 гэһэн тоотойгоор Оһын аймагай аша туһада түгэсэбэ.

Бүхы мүрысөөнэй шангуудай жаса 800 мянган түхэриг болобо. Нэгэдэхи һуури эзэлһэн барилдаашадта 30 мянган түхэриг, хоёрдохи һуури эзэлһэн барилдаашадта 20 мянган түхэриг, гурбадахи һуури эзэлһэн барилдаашадта 10 мянган түхэриг барюулагдаха. Илалта туйлаһан һоригшо 10 мянган түхэригтэ хүртэхэ юм.