«Эсэгын эрэлхэг зориг»

гэhэн Хүндэлэлэй тэмдэгтэ Эсэгын үдэрэй дэргэдэ Эрхүү можын 15 эсэгэнэр   элирүүлэгдэбэ.

Тэрэ тоодо манай округой Оһын аймагай Александр Балтуев, Баяндайн Александр Мантатов, Эхирэд-Булагадай аймагай Андрей Дьячок болон Нүхэдэй аймагай Олег Соколов болоно.

– Гэр бүлын толгойлогшо хадаа ганса тэжээгшэ бэшэ, тэрэнэй түшэг тулгуури, бүхы гэр бүлынхидтэ туһалагша, жэшээ болоно. Үхибүүнэй зан абари хүгжөөхэ, тэдэнэй хүмүүжүүлгэдэ, дүтынгөө зондо харюусалгатай, хүндэлхэ, мүн тоонто нютагтаа дурлал түрүүлхэ хэрэгтэ эсэгын үүргэ илангаяа шухала, – гэжэ Игорь Кобзев тэмдэглэбэ.

Иимэ эсэгэнэрэй ашаар гүрэнэймнай ёһотой эрхэтэд үндынэ, гэр бүлын үнэтэ зүйлнүүд бэхижэнэ, элүүр энхэ ниигэм байгуулагдана. Энэ мүрысөөн эсэгын нэрэ хүндые дээшэлүүлхэ, харюусалгатай эхэ эсэгын хүмүүжүүлгын талаар хараалагданхай.

Эсэгэнэр гээшэ ёһотойл баатарнууд! Тэдэнэй хэһэн ажал, анхарал анхаралгүй үнгэрдэггүй.

Мүнөө жэлдэ тэдэнэй нэгэн Александр Маркелович Мантатов тусхай шагналда хүртөө. Мантатовтан гэр бүлэ – заншал ба шэнэ юумэ нэбтэрүүлгын эбтэй эетэй холисо, эдэбхитэй байдал ба дулаахан сэдьхэлэй гэрэлтэһэн жэшээ болоно. Гэр бүлын толгойлогшо Александр Маркелович эсэшэгүй эршэ хүсэтэй хүн юм. Соёлой байшангай дэргэдэхи һайн дуратанай бүлгэмэй хүтэлбэрилэгшөөр ажалаа эхилһэн хадаа, иигээд зогсонгүй, олзын хэрэг эрхилэлгэдэ бэеэ бэелүүлээ. Теэд хүндэ алба хэхэ гээшэ тэрэнэй ажабайдалай гол уряал болоһон юм.

Тойрогой «Эсэгын зүблэл» болон «Өөрынгөө орхиногүйбди» гэһэн волонтёрнуудые дэмжэлгын жасын түрүүлэгшэ хадаа Александр Маркелович тойроод һанаагаа зободог хүнүүдые суглуулжа, һайн дуратанай ехэ хэмжээ ябуулгануудые эхилээ. Тэрэнэй аша габьяа областной «Гордость Иркутской земли» гэһэн шагналаар тэмдэглэгдээ. Ажал ехэтэйшье һаа, Александр Мантатов зохёохы ажалда саг олодог, олондо мэдээжэ «Худайн гол» гэһэн арадай уран бэлигэй габьяата ансамблиин гол дуушан юм.