Арадай нааданууд

Усть-Орда тосхоной «Хан-юрта» гэһэн талмайда «Буряад арадай нааданууд» гэһэн можо хоорондын нээмэл этнофестиваль үнгэрбэ. Тэрэнэй нээлгэндэ айлшадые болон хабаадагшадые «Возрождение» гэһэн ИРОО-гой түрүүлэгшэ Варвара Хангуева болон «Буряад соёлой түб» гэһэн ниитын эмхиин түрүүлэгшэ Оксана Афиногенова гэгшэд мэндэшэлээ.

Заншалта арадай наадануудта Буряад Уласһаа, Үбэр Байгалай хизаарһаа, Эрхүү можоһоо 250 гаран хабаадагшад суглараа. Буряад арадай долоон янзын наадануудаар: hээр шаалган, шагай наадан, шатар, баабхай шэдэлгэн, мори буляалдан, туулган тобшо, мушхуур таталган мүрысөөнүүд эмхидхэгдээ.

Байгша оной Буряад арадай нааданай Этнофест дээрэ гурбан абсолютно илагшад элирүүлэгдэбэ. Буряад шатараар Эхирэд-Булагадай аймагай Виталий Шодноев чемпион болоо.

Шагай нааданда мүн лэ Эхирэд-Булагадай аймагай Сергей Булгадаев абсолютно илагша гэжэ тодороо. Шанга тулалдаанай һүүлээр Буряад Уласай Захааминай аймагай Золто Базаров һэер хухалгаар абсолютно чемпионой нэрэ зэргэдэ хүртөө. Фестивалиин эгээл толотомо, олоной анхарал татадаг энэ тулалдаанда аяар 108 тамиршад хабаадаhан.

Захааминай команда түрүүшын һуури эзэлээ. Турнирые олондо мэдээжэ хатаршан, блогер Буряад Уласай Алексей Раднаев хүтэлөө.

Арадай наадануудта «Мори урилдаанда» Ойхоной Александр Манхаев, «Туулган тобшо» Ахын аймагай Аламжа Габаев, Руслан Николаев, «Баабхай шэдэлгэн» Эдуард Болхосоев (Эхирэд), Адиса Шадгарова, «Мушхуурга таталга» Арина Гомбоева, Марианна Бужинаева, Ратмир Батанов, Вячеслав Евдокимов, Станислав Маланов булта Ойхоной аймаг, Хурумхаанай Бэлигто Бэликтуев гэгшэд илагшад болобо. «Һэер шаалган» тулалдаанай өөрын наһанай бүлэгүүдтэ Ойхоной Давид Бутуханов, Эхирэд-Булагадай аймагай Руслан Табаров, Буряад Уласай Арсалан Очиров, Артур Цыбикжапов, Владимир Доржиев гэгшэд илаба. «Шагай наадан» эрэшүүлэй дунда Никита Баршуев (Эхирэд), Бато Селезнев (Нүхэд), Валерий Бубаев (Эхирэд) түрүүшын һууринуудые эзэлээ. Харин эхэнэрнүүдэй дунда Кристина Гуслякова, Ойхоной Марианна Бужинаева, Эхирэдэй Ирина Абагаева гэгшэд илагшадаар тоологдоо. «Шатар» нааданда Дамир Баинов, Виталий Шодноев, Арьяна Багдаева, Елена Ефремова гэгшэд өөһэдынгөө наһанай бүлэгүүдтэ түрүүлээ.

Һэер шаалгаар эгээл залуу хабаадагша Ойхоной аймагай 9 наһатай Давид Бутуханов тусхай шанда хүртөө. Эхэнэрнүүдэй дунда Виктория Пензина (Эхирэд) «һээр хухалганда» түрүү һуури эзэлээ.

«Үреэлэй дээжэ» гэһэн гое һайхан онлайн-мүрысөөн мүн лэ эмхидхэгдэжэ, Эхирэд-Булагадай аймагай Олойн «Арюун булаг» гэһэн буряад арадай бүлгэм илалта туйлаба.

Абсолютно илагшадта тусхай шан «Халхан» гэһэн Саяна болон Иван Брагинтанай гэр бүлын мастерской бүтээгээ.

Арадайнгаа эртэ урда сагһаа эхитэй   наадануудые, еһо заншалнуудые һэргээжэ, бага ехэгүй хаа яанаһаа сугларжа, үндэһэн хубсаһа, түрэл хэлэ. еһо гуримуудаа сахижа ябаһан эрхим зондоо сэдьхэлэй ехэ баярые хүргэнэбди! Арадай наадануудай эмхидхэгшэ «Возрождение» ниитын эмхинэй, олон тоото волонтернуудай ехэ хүдэлмэри онсо тэмдэглэлтэй.