Элинсэгүүдэй хубсаhан

Ноябриин 17-до Усть-Ордын арадай уран гартанай түбэй үзэсхэлэн дэлгэдэг танхим соо Байгал шадарай үндэһэн арадуудай болон урданай зоной заншалта хубсаһанай үзэсхэлэн нээгдэбэ.

Үзэсхэлэндэ Эрхүү можын бэлигтэй дархашуулай түүхын болон этнографическа талаар тон үндэр хэмжээнэй нарин нягтаар дархалһан 18-19-дэхи зуун жэлнүүдэй һэльбэн шэнэлэгдэһэн арадай хубсаһанай суглуулбари табигданхай.

Энэ суглуулбари Юрэнхылэгшын грантнуудай жасын дэмжэлгээр үнгэргэгдэдэг «Соёлой баялиг сахиха» гэһэн түсэлэй хэмжээндэ ороно.

Выставкын нээлгэндэ «Оникс» гэһэн Эрхүү можын ниитын «Союз мастеров народного искусства» эмхинэй гүйсэдхэхы дарга Елена Гусева сугларагшадые мэндэшэлээ.

Буряад үндэһэн хубсаһан тухай Эрхүү можын арадай мастер, Усть-Ордын Үндэһэн арадай уран олзоборилгын түбэй уран зурааша Юлия Харгаева хөөрэбэ.

Экскурси Эрхүү можын арадай мастер, «Этнокультурный центр народов Севера» гэһэн ниитын эмхинэй түрүүлэгшэ Евгения Гомбоева үргэлжэлүүлжэ, эвенк, тофалар арадуудай хубсаһантай танилсуулба.

«Русский костюм Союза мастеров «Оникс»» гэһэн һуралсалай зохеохы мастерскойн хүтэлбэрилэгшэ Светлана Еремина ород арадай хубсаһан тухай хөөрэбэ.

Гүрэнэй дуу болон хатарай «Талын аялганууд» ансамблиин дуушад Сэсэгма Дугарова болон Бато Шарастепанов сугларагшадта һайхан аялга дуугаа бэлэглээ.

Энэ үзэсхэлэн ноябриин 25 болотор үргэлжэлхэ.