Ёрдын нааданууд – эрхимүүдэй тоодо

«Ёрдын нааданууд – Евразиин арадуудай нааданууд» гэһэн уласхоорондын этносоёлой фестиваль «Russian Event Awards» гэһэн хэмжээ ябуулгын аяншалгын уласхоорондын шагналда гурбадахи һуури эзэлээ. Тус хэмжээ ябуулга ноябриин 27-28-най үдэрнүүдтэ Нижний Новгород хотодо үнгэрөө.

Россиин 63 можо нютагуудһаа, мүн Беларусь Уласһаа болон Урда Осетиһаа бүхыдөө 473 түсэл шагналда хүртэхэеэ эльгээгдээ.

Эрхүү можын Засагай газарай болон Байгал шадарай үндэһэн арадуудай соёлой түбэй эмхидхэһэн фестиваль 22 хабаадагшадай дунда «Эрхим этнокультурна хэмжээ ябуулга» гэһэн шэглэлээр нэрлэгдээ.

Байгал шадарай үндэһэн арадуудай соёлой түбэй захирал Александр Стариков, Байгал шадарай үндэһэн арадуудай соёлой түбэй хүгжэлтын болон мэдээсэлэй таһагые даагша Виталий Гырылов гэгшэд тус түсэл хамгаалһан байна.

«Ёрдын наадан» – миин наадан бэшэ, харин Байгал далайн эрьедэ оршодог нангин Ехэ Ёрд уула шадар эхитэй Евразиин арадуудай эртэ урдын заншал һэргээн бодхоолго болоно.