«Сэдьхэлэйм хүбшэргэйһөө»

Усть-Ордын М.Н. Хангаловай нэрэмжэтэ Үндэһэтэнэй номой санда буряад хэлэнэй багша, Бүгэдэ буряадуудай «Алтаргана» фестивалиин лауреат Ринчима Малышевагай «Сэдьхэлэйм хүбшэргэйһөө» гэһэн түрүүшын шүлэгэй согсолбориин танилсалга болобо.

Энэ хадаа бэлигтэй уран шүлэгшэнэй удаан хүлеэгдэһэн зохёохы дебют болоно.

Хада уулата Захаамин тоонтотой Ринчима Малышева бага наhанhаа буряад хэлэн дээрэ шүлэг бэшэдэг, шэнэ номынь олон жэлэй ажалай, бодомжолгын орьёл болоно.

Түрэл хэлэн, соёл, оюун сэдьхэлэй үнэтэ зүйлнүүд тухай өөрын дүршэл, бодомжолго харуулһан зохёолнууд энэ согсолбори соо оронхой.

Номой танилсалгада хабаадагшад авторай поэзи шэнжэлжэ, асуудалнуудые табижа, мүнөө үеын буряад литературада шүлэглэмэл хэлэнэй удха шанар тухай хэлсэхэ аргатай байба.

Оюун бэлигтэй уран шүлэгшые олон тоото нүхэдынь, түрэлнүүд болбосоролой, соелой һалбариин түлөөлэгшэд хани халуунаар амаршалаа.

Багшынгаа уран мүрнүүдые Хөөрсэгэй һургуулиин һурагшадынь гүйсэдхөө.

Тоонто нютаг, хайрата эжы аба, гэр бүлэ,байгаали, алдарта сэрэгшэд тухай уянгата мүрнүүд хүнэй сэдьхэл хүдэлгэнэ. Ринчима һайхан сэдьхэлтэй, урид һанаатай, буряад эхэнэрэй бүхы эрхим шэнжые шэнгээһэн юм. Номгон даруу абари зантай, энеэбхилһэн шэг шарайнь хүнэй дура гансата буляадаг. Энээн тухай хамта хүдэлжэ байһан нүхэдынь тон дүтөөр хэлээ.

Алишье талаараа эрдэм бэлигтэй, олон мэргэжэлтэй бухгалтер, массажист, логопед, уран зурааша, багша, энэрхы эжы, найдамтай хани нүхэр болоно.

Манай газетын хуудаһануудта Ринчима Малышевагай шэнэ зохеолнууд нэгэтэ бэшэ хэблэгдэһэн.

Гүрэнэй дуу болон хатарай «Талын аялганууд» ансамблиин бэлигтэй хүгжэмшэд Елизавета Ажунова йочин дээрэ, Сэсэг Дондокова хучираар ирагуу гое аялгануудые зэдэлүүлээ.

Мэдээжэ дуушан Леонид Будаев дуунуудаа бэлэглээ.

Ирагуу найруулагшын оюун бэлиг заха хизааргүй.

Уянгата һайхан мүрнүүд

Уян гуурһан дороһоонь

Далайн долгин мэтэ

Долгилон гаража ,

Арад зоноо баярлуулан

ябахыень, эрхим хүндэтэ

Ринчима Ломбоевнада хүсэнэбди!