Эрхим дүршэлөөр хубаалдалга

Декабриин 5-да Оhын аймагта «Лучшие практики преподавания бурятского языка на территории Усть-Ордынского Бурятского округа» гэһэн болбосоролой стажировко үнгэрбэ.

Энэ хэмжээ ябуулга 2025 ондо «Усть-Ордын Буряадай тойрогой болбосоролой системые мүнөө үеын социально-экономическа оршон байдалда хүгжөөлгэ» гэһэн түсэлэй харгын карта бэелүүлгын хэмжээндэ Эрхүү можын гүрэнэй болбосоролой хүгжэлгын институдай этнорегиональна болбосоролой түб болон тойрогой захиргаанай үндэһэн хэлэнүүдэй таһаг эмхидхээ.

Бэлшэрэй һургуулиин талмайда һуралсалай практикада ерэһэн табин шахуу сугларагшадые тойрогой захиргаанай хүтэлбэрилэгшын орлогшо Андрей Дмитриев мэндэшэлээ.

Һуралсалай стажировкын программада Оһын муниципальна тойрогой буряад хэлэ ба уран зохёолой багшанарай, эхин классуудай багшанарай нээмэл хэшээлнүүдые харуулаа.

2-дохи класста «Юүмэнэй нэрэ» хэшээл Yлеэн һургуулиин Октябрина Михайлова, «Дуратай эдеэн. Юумэнэй нэрэ» 3-дахи ангида Бэлшэрэй һургуулиин Маргарита Николаева, 4-дэхи класста «Буряад хубсаhан. Үйлэ үгын саг» хэшээл Үбэсын һургуулиин Светлана Халматова, 7-дохи класста «Хандаһан түхэл» Эрхэдэйн һургуулиин Гэрэлма Абгулдаева, 8-дахи класста «Абай Гэсэр хүбүүн» Бэлшэрэй һургуулиин Дарья Спасова гэгшэд үгэһэн байна.

Этнокультурна болбосоролой элдэб шэглэлнүүдээр оһын багшанар мастер-класс бэлдээ. «Использование возможностей образовательных платформ для повышения у обучающихся мотивации к изучению бурятского языка» тухай Бэлшэрэй һургуулиин буряад хэлэнэй багша Екатерина Халматова танилсуулаа.

«Буряад хэлэнэй хэшээлнүүдтэ шэнжэлхы задачануудай теориин приём хэрэглэлгэ» гэһэн һонирхолтой авторска арга тухай тойрогой эрхим буряад хэлэнэй багша Дарья Спасова харуулжа, сугларагшадай ехэ анхарал татаба. Иимэ аргануудые хэшээлдээ хэрэглэбэл, һурагшад түрэл хэлэеэ дуратайгаар үзэхэ һэн гээд һанагдана.

«Буряад арадай ёhо заншал дээрэ хүндэhэлэн буряад хэлэндэ hургалга» дүршэлтэеэ Бэлшэрэй һургуулиин дарга, буряад хэлэ болон уран зохеолой багша Валентина Хартанова хубаалдаба. «Буряад хэлэ үзэлгэдэ оршуулгын аргануудые хэрэглэлгэ» тухай Буряад-Енгүүдэй багша Инна Атутова хөөрэжэ, сугларагшад хамтадаа оршуулһан дуунуудые зэдэлүүлээ.

Тойрогой эрхим буряад хэлэнэй багшанарай жэшээтэ харуулганууд бултанда һайшаагдаа.

Хэмжээ ябуулгануудай дэргэдэ танилсалгын талмайнууд эмхидхэгдэһэн юм. Тэндэ Бэлшэрэй уран урлалай мастернууд Надежда Ашаханова гай зурагууд, Илья Ашахановай уран бүтээлнүүд табигдажа, авторнууд хүдэлмэринүүдтэеэ танилсуулаа.

Мүн буряад арадай нааданууд: «Шагай наадан», «Тэбэг», «Һээр шаалган» һурагшад харуулһан байна.

Һуралсалай стажировкын түгэсхэлдэ Бэлшэрэй һургуулиин үхибүүдэй уран һайханай коллективүүд «Сэсэг» хатарай ансамбль, «Гал гуламта» фольклорно бүлэг гое һайхан концерт табижа, сугларагшадые баясуулаа. Этнокультурна болбосорол дээдэ хэмжээндэ табяатай гээд һурагшадай шадабари гэршэлнэ.

Хэмжээ ябуулгын хабаадагшад хараһан хэшээлнүүдтэ, мастер-классуудта үндэр сэгнэлтэнүүдые үгэжэ, ехэ аша үрэтэй, туһатай мэдээсэл абаһандаа оһын багшанарта, Бэлшэрэй һургуулиин коллективта, болбосоролой хүгжэлгын институдай этнорегиональна болбосоролой түбтэ болон тойрогой захиргаанай үндэһэн хэлэнүүдэй таһагта баяр баясхаланиие хүргэбэ.

Дополнительные фотографии:  Загрузить / Загрузить