«Наранай туяагай» аялгын шэдинүүд

Буурал хангай дайдымнай сахюусад, бурхад, буурашагүй hүлдэтэ араднай үлзы хөөрхэн хүүгэдэйнгээ хүгжэм дуу шагнан баясажа, шэг шарайгаа сэлмээжэ, сэдьхэл бодолоо тэниилгэжэ байдаг ха юм.Манай тойрогто хүн бүхэнэй сэдьхэл уяруулха шэдитэй УОБАО соелой габьяата ажаябуулагша, олондо мэдээжэ бэлигтэй дуушан Баярма Гилязовагай хүтэлбэрилдэг хүүгэдэй дуунай «Наранай туяа» ансамбль бии болоhон сагhаа элдэб хэмжээнэй конкурс-фестивальнуудай нэгэтэ бэшэ лауреат, Гран-придэ хүртэгшэ болоно. Тэдэнэрэй хонгео hайхан хоолойнууд Монгол орондо, Новосибирск, Красноярск, Казань, Санкт-Петербург хотонуудай тайзанhаа зэдэлhэн байдаг. Эдэ үдэрнүүдтэ Усть-Орда тосхоной «Наран» сүлөө сагай түбтэ энэ хүүгэдэй арадай нэрэ зэргэтэй коллективай тоосоото тоглолто үнгэрбэ. Хорин табан хүгжэмтэ номернуудhаа бүридэhэн «Зүрхэнэй аялга зорюулнабди» гэһэн программа нэгэ амисхал доро үнгэрөө.

Харагшадай анхаралда буряад арадай, хүгжэмшэдэй дуунууд, гое һайхан хатарнууд табигдаба. Ансамблиин дуушад Диана Шадгарова, Александра Алхансаева, Айлана Гилязова, Инга Шобдоева, Ольга Альхеева, Баирма Буруева, «Алтан булжамуурай» эдир дуушад, «Тэрэнги», «Радуга» хатарай коллективүүд, Семен Мадасов, Леонид Будаев гэгшэд мартагдашагүй баяр бултанда асарба.

Концертын айлшан – Баяндайн аймагай «Грация» гэһэн Бэлигма Моргоровагай хүтэлбэри доро хатарай ансамбль хойто зүгэй арадуудай хатар бэлэглээ.

Буряадай мэдээжэ хүгжэмшэн Цырен Шойжонимаевай «Эхэ хэлэеэ үргэе!» гэhэн мэдээжэ болоһон дуун дахяад концертэдэ зэдэлээ. Энэ дуун хүүгэдэй мэдэрэлые далижуулан, эхэ хэлэеэ шудалжа, би буряад хүнби гэжэ омогорхон, орон нютагаа, эхэ байгаалияа хайрлажа, сэгнэжэ һурахадань, үнэхөөрөөл, нүлөө үзүүлнэ бшуу. Бэлигтэй дууша багашуулнай эхэ нютагайнгаа нэрэ хүндыень үргэжэ, хаанашье арад түмэнөө түлөөлхэ шадалтай байгуужан! Хүхюун, дорюун буряад хүүгэдэй аялга дуунууд үргэн уужам нютагтаа хэзээдэшье зэдэлэг лэ!

Дополнительные фотографии:  Загрузить / Загрузить